ياللي غلاك القلب

 

ياللي غلاك القلب من قال انسـاك انسى حياتي لو بلحظـة  نسيتـك

انته بقلبي تحت لضلاع  مرسـاك وش لون باتناساك والقلب  بيتـك

ياراس مالي يارصيدي  والامـلاك ياليلي اللي همت فيـك وسريتـك

دامك حبيب الروح هالروح تفـداك وانـا بكلـي ياهوايـا  فديـتـك

حبك ترى بالقلب مشبوك  لسـلاك من قبل سن الرشد وحدك هويتـك

ياكثر شوقي لك وياكثـر ماهـواك وياكثر ماحنت خفوقـي  وجيتـك

في ليل مظلم داعساً فوق لشـواك وياكثر ما أكتب حـروف وقريتـك

في صفحة الاشعار احساس وادراك أكتب وأمحي وانت ماقـد محيتـك

انت الوحيد اللي مع الحرف  اقراك وترقص حروفي شعر لامن طريتك

اصيد بك لفكار من بيـن لسمـاك من غبة البحر العميـق  وبنيتـك

صورة خيالية ولا الوقت  يمحـاك يالغالي اللي من فـؤادي  غليتـك

حبـي ورب الكـون  لاماتخطـاك رغم الفراق المـر ماقـد جفيتـك

عن درب غيرك اعلن القلب لمساك يادربي اللي عالطوالـع  مشيتـك

دارت بي الدنيا كمـا دور  لفـلاك ياحب في دنيا الشقـاء  ماهنيتـك

حظي تعثـر وانـت لاويـن وداك عسى إلهي يعطيك حسـب نيتـك

وعسى يصبرني على طول فرقـاك وعسى يخفـف لوعتـي لابكيتـك