يافهد ناصر قوم فـك  الشريحـة ثلاثـة اشهـر مـايـرد التليـفـون

قالوا مصيف جنـب حسنـا مليحـة في عشقها قد صرت مغرم ومجنـون

خفف شوية خايـف اطيـح  طيحـة طيحة جمل منحور من قطع مسنـون

خذ من صديقـك ياعميلـي نصيحـة على الهوى يافهد بالهون  بالهـون

خذ لك معي جولـة برحلـة مريحـة في بادية اهل الكرم فـوق  صالـون

حيث الهوى تعطـر بنفلـه وشيحـه ويسر قلباً بالهـوى صـار  مفتـون

اطلق لروحك فـي ربـوع الفسيحـة رحلة معية خير مـن الـف مزيـون

يمديك داويـت الخفـوق  الجريحـة ثلاثة اشهور وانت ياخوي مسجـون

حـرام تنسانـا تـراهـا فضيـحـة وش بايقولوا الناس لو كان يـدرون

ياويل من حـب الهنـوف  ومديحـة وياويـل قلبـاً للمليحـات  مرهـون

وياويـل نـاس ٍ للمحبـة  طريحـة بعض العرب لاتزوجوا صدق  ينسون

وان صحت به مليون صيحة وصيحة مايسمعك وان صحت من قلب محزون

يصـد عنـك ياعسـى الله يبيـحـه يصد كنه صار لـك رجـل  مديـون

كـن الضمايـر عندهـم مستريحـة وكن الصداقة عندهـم كنـز مدفـون

ياعزوتـي ذا الهـم ماشـي يزيحـه الا حضورك بيـن خالـد  وهـارون

حضـور يتشـرف بأكـل  الذبيحـة اللي مجهزها على خمسـة صحـون

هذه بيوتـي سقتهـا مـن  قريحـة من فكر شاعر كل ماقـال  مضمـون

جاوب عليهـا والجبـل ذاك  زيحـه وان ماقدرت اتزيحه انجيب  عبـدون

وانجيـك فـي ليـلاً والا  صبيـحـة ونخلّصـك منّـه وابليـس  ملعـون

اهـم شـي انـك تفـك الشريـحـة ولاتقـول العمـر للزيـن مـرهـون

وختامهـا باللـي لسانـه  فصيحـة بأزكى صلاتي عـد ماهلـت مـزون

صـلاة ربـي مالنفـل فـاح ريحـه على رسول الخيـر مليـون مليـون